Трајче Заев, братучед на поранешниот премиер Зоран Заев и могул во бизнисот со канабис во Македонија, со кодирани пораки се обидувал да спречи објавување на аудиоразговори во кои наводно имало докази дека државни функционери од СДСМ и ДУИ саботирале и минирале акции на американска агенција за борба против дрогата (ДЕА) насочени кон сузбивање на шверц на марихуана, тврди албанската телевизија „Ора њуз“.

Според „Ора њуз“, лице чијшто идентитет е познат на редакцијата, поседувало аудиоснимки на кои се посочуваат државни функционери и полицајци кои ја саботирале акцијата на ДЕА, без да се посочи точно за која акција станува збор. Тоа лице наводно контактирало со Трајче Заев, кој во кодирана порака побарал снимката да не се објавува.

„Мислам дека би била многу позната книга кога би била објавена. Според мене, оваа книга треба да има што помала публика, но секако дека зависи од вас. Ајде да договориме уште една средба, следната недела“, гласи пораката што наводно ја напишал Трајче Заев, според албанската телевизија.

Телевизијата не објавува за која точно „акција на странски агенции“ во Македонија, која наводно била спречена од високи владини функционери станува збор. Во јавноста досега единствена потврдена акција на ДЕА во земјава беше случајот со заплената на 200 килограми марихуана на планинскиот превој плетвар кај Прилеп во април 2021 година.

Оваа акција е и воедно единствената досега која покажува поврзаност на името на Трајче Заев и странски агенции кои се борат против шверц на наркотици, бидејќи еден од уапсените беше и Александар Ушликовски, за кого опозицијата тогаш тврдеше дека бил возачот на Трајче Заев.

СДСМ, ДУИ и Трајче Заев засега молчат во врска со случајот и тешките обвинувања изнесени во прилогот на „Ора њуз“.

Според „Телма“, можно е случајот и приказната објавена од „Ора њуз“ да имаат сосема друга позадина – пресметка меѓу албански бизнисмен и заменик-министерот за внатрешни работи Назим Буши, кои за допирна точка ја имале фабриката за производството на медицински канабис „Фајв Летерс“, каде тој бил неофицијален партнер со синот на Буши.

„Пресметката е поради внукот на албанскиот бизнисмен, кој е уапсен во декември 2020 година и осуден токму поради кражбата на 60 килограми канабис од фабриката „Фајв Летерс“ во која подоцна полицијата најде уште неколку стотини килограми непријавен канабис кој требаше да заврши на црниот пазар.
Во „Фајв Летерс“, во април минатата година, беше извршена уште една кражба и беа украдени околу 70 литри масло од хашиш вредно неколку милиони евра. За оваа кражба е отворена истрага а осомничени нема“, пишува „Телма“.

Според информациите на телевизијата, бизнисменот од Албанија во минатото имал средби со Буши и неговиот син токму во фабриката „ Фајв Летерс“ од кога и датира сликата со паркираното „Ауди“, но тој се среќавал и со повеќе други сопственици на погони за производство на канабис, кои, според изворот, на „Телма“, ги снимал.

На Плетвар во 2021 година беа запленети околу 200 килограми марихуана во вредност од 800 илјади евра. Беа приведени шестмина, меѓу кои и Ушликовски и тогашниот командир на прилепската полиција, Кире Спиркоски. Сите освен Спирковски признаа вина и добија затворски казни од три и пол до пет години, додека поранешниот командир и натаму е во куќен притвор, во очекување на епилогот од жалбената постапка пред Апелацискиот суд.