Општина Ѓорче Петров за првпат годинава ќе доделува субвенции за нови велосипеди и клима уреди.

За таа цел, општината издвојува средства во износ од 500.000 денари за субвенционирање на дел од трошоците за купен велосипед, во висина до 3.000 денари по лице. Истовремено, обезбедени се и 1.000.000 денари за субвенционирање на трошоци за набавка на клима уреди и топлотни пумпи, со цел замена на постоечките нееколошки уреди на јаглен, дрва или мазут.

Граѓаните, како што наведуваат од општината, може да добијат до 15.000 денари за клима уред, до 21.000 денари за топлотна пумпа.

„Со овие мерки покажуваме дека општината активно се вклучува во поддршка на граѓаните и заштита на животната средина. Ги поттикнуваме одржливите форми на транспорт и овозможуваме премин кон почисти и побезбедни енергетски решенија. Секоја инвестиција што значи подобар квалитет на живот за нашите сограѓани е вредност за која вреди да се бориме“, изјави градоначалникот на Општина Ѓорче Петров, Александар Стојкоски.

Право на користење имаат сите жители на општината, кои ќе ги исполнат условите од јавниот повик кој пак ќе биде објавен наскоро. Се повикуваат сите заинтересирани граѓани да аплицираат навремено.