Со решение од Министерството за економија и труд, Организацијата на потрошувачите на Македонија, стана овластено тело за заштита на колективните интереси и правата на потрошувачите. Решението е доделено во јуни годинава, а е во рамки на надлежностите на Законот за заштита на потрошувачите. Овластените тела за заштита на колективните интереси и права на потрошувачите можат во постапка пред надлежен суд или пред органите за надзор на пазарот, покрај барањата утврдени со посебни прописи, да побараат и: итна забрана или престанување, во итна постапка, на која било повреда; објавување на соодветен начин и форма на одлуката, во целост или делумно, како и барање за објавување исправка и/или јавно извинување, а за целите на отстранување на понатамошните последици од повредата, плаќање судски пенали поради евентуално непочитување на одлуката.

-Ова е можност ОПМ да ги штити правата на сите потрошувачи, кога тие им се повредени од трговците, односно од давателите на услуги, вклучувајќи и давателите на финансиските услуги – објаснуваат од ОПМ.

Законот за заштита на потрошувачите во повеќе одредби го уредува начинот на кој се заштитуваат колективните интереси и права на потрошувачите преку овластени тела, особено кога се повредуваат одредбите од одделни делови од овој закон, како на пример во доменот на договорите на далечина и договорите склучени вон деловните простории на трговецот; сообразноста на стоките; трговската гаранција; нечесните до говорни одредби; нечесните трговски практики, и сл.

-Исто така кога се заштитуваат колективни интереси и права на потрошувачите преку овластени тела, се земаат предвид повредите на одредбите од: Законот за заштита на потрошувачите при договори за потрошувачки кредити; Законот за аудио и аудиовизуелни медиумски услуги; Законот за туристичката дејност; Законот за облигационите односи; Законот за електронска трговија; Законот за лековите и медицинските средства; Законот за давање на финансиски услуги на далечина и други закони и прописи – додаваат од ОПМ.