Глобалната побарувачка за нафта ќе расте малку побавно од очекуваното оваа и идната година како резултат на новите американски царини, соопшти денеска Организацијата на земјите извознички на нафта (ОПЕК).

Според сегашната прогноза, дневната побарувачка за сурова нафта ќе се зголеми за 1,3 милиони барели – стандардна мерка за индустријата од 159 литри секој – до 105,05 милиони барели во 2025 година, се вели во месечниот пазарен извештај на картелот објавен во Виена.

ОПЕК претходно очекуваше зголемување од 1,4 милиони барели. Прогнозата за раст за 2026 година исто така беше намалена од 1,4 милиони на 1,3 милиони барели.

Глобалната економија е под влијание на зголемената несигурност во екот на растечкиот царински конфликт, се вели во извештајот.

Според тоа, аналитичарите на ОПЕК очекуваат глобалната економија да порасне за три отсто годинава и за 3,1 отсто идната година.