Триесет ученици кои подолго од три недели се на болничко или домашно лекување од 1 септември активно следат онлајн настава, информираше министерката за образование и наука, Весна Јаневска.

Дел од учениците се вклучени онлајн на часовите заедно со своите соученици, додека со други наставниците одржуваат индивидуална настава преку дигиталните платформи ЕДУИНО и nastava.mk.

Според Министерството за образование и наука (МОН), оваа системска мерка е резултат на соработката со Министерството за здравство и со здружението САНО – Здружение за поддршка на децата заболени од канцер. Преку неа, како што велат, првпат е овозможено формално образование во здравствените установи и во домашни услови, за сите ученици кои поради здравствени причини не можат физички да посетуваат настава подолго од три недели.

Децата што лежат долго на Детската клиника, од 1 септември ќе следат настава

– Ниту еден ученик нема, ниту смее да биде лишен од образование само затоа што се лекува. Здравствената состојба не значи изолираност, прекин на образованието или заборавеност. Напротив, болеста е предизвик, а општеството е обврзано да им даде поддршка и надеж. Со инвестирање во нивното знаење, инвестираме во една поправедна, поемпатична и посилна иднина – изјави министерката Јаневска.

Од МОН изразија благодарност до наставниците кои се вклучени во реализацијата на наставата за овие ученици за нивната пожртвуваност и посветеност, како и до родителите и старателите за поддршката и активното учество во процесот.