Министерот за внатрешни работи Оливер Спасовски попладнево на анкетната комисија во Собранието формирана за да се утврди политичка одговорност за скандалот на Клиниката за онкологија, откри дека се водат финансиски истраги против 7 лица од оваа клиника.

Во однос на тоа што се укажува од страна на експерти дека сите кои се виновни треба да се во притвор, апсолутно потврдувам дека секој за кој ќе се утврди вина, ќе треба не само да е во притвор, туку и да носи одговорност пред надлежниот суд и да биде осуден. Како податок да ви кажам дека досега постапувавме по неколку наредби за обезбедување на докази и паралелно за повеќе лица веќе се водат и финансиски истраги. Некаде за околу седум лица покрај кривичната истрага се води и финансиска истрага во однос на овој процес. Доказите се обезбедени, одземени се електронските уреди, одземени се здравствените картони и на тоа што го пишува во документите и она кое е во електронските уреди не може да влијае никој. Тоа е непобитен факт, изјави министерот Спасовски.

Тој додаде дека во времето на министерувањето на Беким Сали, во МВР или во Обвинителството не е пријавено кривично дело на Клиниката за онкологија.

Првото дејствие го преземаме на 1 септември 2023 година кога друг е министер. Сега ни претседател на држава ни премиер не може да изврши притисок на ова што сега го работиме и да ги негира доказите што сме ги обезбедиле со Јавното обвинителство, уверува Спасовски.