Неколку европски федерации на производители на текстил и облека заеднички бараат итна акција од страна на Европската Унија против појавата на „експресна мода“ – бизнис модел на копирање на најновите трендови во високата мода, масовно производство по ниска цена и брзо нивно пласирање во малопродажба кога побарувачката е најголема.

За да се запре „невиденото зголемување на текстилниот отпад“ и „неподносливиот притисок врз европските компании“, потписниците ја повикуваат ЕУ „без одложување“ да ги зајакне царинските бариери и да ги забрза тековните истраги против платформи како „Тему“ или „Шејн“, според писмото што ќе биде испратено до Европската комисија утре, објави агенцијата Франс Прес, која имаше пристап до текстот- пренесе Политика.рс.

Претставничкото тело Euratex (Европската унија за облека и текстил), како и здруженијата на производители од Франција, Италија, Шпанија, Германија, Грција, Швајцарија, Белгија и Португалија, наведуваат дека „со длабока загриженост го забележуваат растот на компаниите во е-трговијата, со 4,5 милијарди пакети увезени во ЕУ во 2024 година. Тие посочуваат дека овој бизнис модел е спротивен на важечките правила на ЕУ и ги крши правата на интелектуална сопственост со лажни тврдења.

Затоа повикуваат на реформа на европското царинско право со укинување на ослободувањето од царински давачки за пакети во вредност помала од 150 евра, што моментално им користи на азиските гиганти за е-трговија. Новиот извештај, кој ја опфаќа првата половина од оваа година, покажува дека бројот на корисници достигнал 115,7 милиони корисници низ цела ЕУ, што е за 12,9 милиони повеќе отколку во втората половина од минатата година.

Сопственикот на апликацијата „Тему“ е најбогатиот милијардер во Кина

Голем дел од овој раст се должи на силната експанзија на „Тему“ на клучните пазари. Франција е предводник со 2,6 милиони нови корисници, што е зголемување од 19,4 проценти. Во Шпанија, базата на корисници пораснала за 15,6 проценти, според порталот за е-трговија. Како многу голема онлајн платформа, Законот за дигитални услуги бара од Тему да објавува извештај за транспарентност на секои шест месеци. Овие извештаи го вклучуваат просечниот број на месечни корисници низ Европската Унија, како и во поединечните земји-членки. Германија, исто така, забележа нагло зголемување на корисниците на Тему, како и другите водечки пазари – Полска и Италија. Највисок процентен раст е забележан во Романија, каде што бројот на корисници се зголеми за 20,5 проценти на 4,7 милиони.

Сепак, на повеќето помали пазари на компанијата, растот заостанува зад европскиот просек. Тему, наводно, е под строг надзор од интересни групи и влади низ цела Европа и во поединечни земји-членки. Франција дури неодамна во Брисел предложи платформата да биде отстранета од листата на Google и други пребарувачи ако продолжи да ги крши европските правила, меѓу другото, за безбедноста на производите. Малку повеќе од една година, Тему им дозволува на европските трговци да продаваат на нејзината платформа. Компанијата, исто така, има за цел да испорача повеќе онлајн нарачки од Европа. Нивната цел е 80 проценти од сите европски нарачки да бидат испорачани од локалните магацини, вели порталот.