Шефот на руската платеничка група „Вагнер“, Евгениј Пригожин, денеска изјави дека околу 10.000 осуденици кои групата ги регрутирала од руските затвори, загинале на бојното поле во Украина.

Минатата година Пригожин ги обиколи руските затвори во обид да ги убеди затворениците да се борат со „Вагнер“ во Украина, во замена за ветена амнестија, доколку преживеат.

„Зедов 50.000 затвореници, од кои околу 20 отсто умреа“, рече Пригожин во интервјуто објавено синоќа од блогерот близок до Кремљ, Константин Долгов.

Пригожин изјави дека сличен процент од убиените има и меѓу оние што го потпишале договорот со „Вагнер“, но не прецизираше точна бројка.

Според него, украинските загуби биле многу поголеми.

„Имам трипати помалку мртви и околу двапати помалку ранети од украинската армија“, изјави Пригожин.