Кошаркарите на Оклахома стигнаа на една победа од пласман во големото НБА финале, откако во драматична завршница во четвртиот натпревар од финалната серија во Западната конференција ја совладаа Минесота со резултат 128:126.

За разлика од претходниот натпревар, во кој целосно потфрлија, овој пат гостите од Оклахома го наметнаа својот ритам уште од самиот почеток. Веќе по првата четвртина имаа предност од седум поени (37:30), а на полувреме заминаа со солидна позитива (65:57).

Минесота се „разбуди“ во третиот период и успеа да го израмни резултатот на 79:79, и беше во игра до самиот крај. Сепак, клучните моменти беа подобро одиграни од гостите, кои останаа смирени и прецизни кога беше најпотребно.

Херој на победата беше МВП-то на лигата, Шеј Гилџес-Александер, кој се истакна со 40 поени, десет асистенции и девет скокови – на чекор од трипл-дабл учинок.

Најефикасни играчи за Минесота беа Никил Александар-Вокер со 23 поени, Џејден МекДениелс со 22, Донте ДиВинченцо со 21, додека Едвардс постигна 16 поени. Петтиот меч од серијата ќе се игра во Оклахома Сити во среда навечер.