Трент Александер-Арнолд (26), официјално потврди дека ќе го напушти англискиот фудбалски клуб Ливерпул на крајот од сезоната 2024/25. Оваа одлука ќе означи крај на една ера на „Енфилд“.

– Прво на сите, сакам да кажам дека оваа одлука воопшто не беше лесна. Вложив многу емоции и размислување во неа. Во Ливерпул сум 20 години, го сакав секој момент и ги остварив сите соништа што ги имав – сè што некогаш сум посакувал.

Секој ден давав сè од себе сите овие години, но дојдов до точка каде што чувствувам дека ми треба промена, нов предизвик како играч и како личност. Мислам дека сега е вистинското време за тоа – се зборовите на Александер-Арнолд.

Се приклучи на академијата на Ливерпул на шестгодишна возраст, а дебитираше за првиот тим во 2016 година. Оттогаш, тој има 352 настапи, постигнато 23 голови и освоено осум големи трофеи, вклучувајќи ја и титулата во Премиер лигата оваа година.

Според најавите, нов клуб на десниот бек од следната сезона се очекува да биде Реал Мадрид.