Уште пред официјално да биде раскинат договорот на Хулен Лопетеги, беше речиси сигурно дека Грем Потер ќе стане нов тренер на англискиот фудбалски клуб Вест хем, а сега таа информација стана и официјална.

Поранешниот тренер на Челси го презеде кормилото на клубот од стадионот во Лондон и тој ќе се обиде да ги врати „чеканите“ на вистинскиот пат.

– Среќен сум што се приклучив на еден таков голем клуб како Вест хем, кој има толку богата традиција и армија навивачи, не само во Англија, туку и ширум светот. За време на моите разговори со раководството на клубот, сфатив дека споделуваме исти вредности и имаме иста визија. Затоа решив да ја прифатам понудата. Долго ја чекав вистинската можност да се вратам на тренерската работа и сигурен сум дека ова е вистинската – изјави Потер.

Заедно со шпанскиот стручњак клубот го напуштија и сите негови помошници, што значи дека Потер во Лондон ќе донесе комплетно нов стручен штаб.

Како што е објавено на официјалната веб-страница на клубот, новиот тренер потпиша две и пол годишен договор, а на клупата на поранешниот шампион на Конференциската лига ќе дебитира в петок на натпреварот од ФА Купот против Астон Вила во Бирмингем.