Ливерпул објави дека на крајот од оваа сезона ќе се раздели со четворица фудбалери, чии договори истекуваат на лето. Тие се Роберто Фирмино, Џејмс Милнер, Наби Кеита и Алекс Окслејд-Чемберлејн.

Фирмино веќе истакна дека ја заврши ерата во Ливерпул, а последните гласини укажуваат на трансфер во Барселона. Бразилскиот напаѓач пристигна на „Енфилд“ во 2015 година од германскиот клуб Хофенхајм. Тој беше платен 29 милиони фунти и дефинитивно ќе остане запаметен меѓу навивачите на англискиот гигант.

Фирмино на тој начин ќе го напушти „Енфилд“ по осум години. Последниот меч ќе му биде на 20 мај против Астон Вила кога ќе се прости од навивачите на „црвените“. Запиша 360 настапи за тимот од Енфилд во изминатите осум години, постигнувајќи 109 гола. Освои бројни трофеи, вклучувајќи ги Премиер лигата и Лигата на шампионите.

We can confirm Roberto Firmino, Naby Keita, James Milner and Alex Oxlade-Chamberlain will leave the club upon the expiry of their contracts this summer.

Special acknowledgements will be paid to the quartet at Anfield, with further tributes to follow at the end of the season.

— Liverpool FC (@LFC) May 17, 2023

Милнер исто така заслужи многу почит и е високо ценет од навивачите на „Енфилд“. Според најавите кариерата ќе ја продолжи во Брајтон. Игра во Премиер лигата повеќе од 20 години, а дебитираше во 2002 година кога имаше 16 години во дресот на Лидс. Настапуваше и за Њукасл, Астон Вила, Манчестер сити и Ливерпул, а на Енфилд остана осум години.

Кеита беше ангажиран во 2018 година за 60 милиони евра, но не ги исполни целосно очекувањата и не се дојде до нов договор со „црвените“. Интерес за него веќе покажа Лион, како и тимот на Лацио, а во игра се и некои клубови од МЛС. Окслејд-Чемберлејн не играше многу оваа сезона, но имаше и разни проблеми со повреди. Тој секако придонесе во неговите години во Ливерпул, но едноставно дојде време за нови предизвици.