Имунитетот на врховниот судија Наќе Георгиев му е одземен ноќеска на итната седница на Судскиот Совет на полноќ и за него е одобрен притвор. Георгиев се сомничи за примање поткуп од 10 илјади евра за да врши противзаконито влијание. Судскиот Совет со 10 гласа „за“ реши да ја изземе јавноста од своето одлучување, па така седницата беше затворена.

Судскиот совет на Република Северна Македонија на 487-та итна нејавна седница одржана на ден 21.05.2024 година расправаше и одлучуваше по барање на Основен кривичен суд Скопје за одземање на имунитет на судија и за одобрување на притвор на судија и ги донесе следните одлуки:

Го одзема имунитетот на судија на Врховниот суд на РСМ, заради непречено водење на кривичната постапка, го одобри барањето за одобрување на притвор на судија на Врховниот суд на РСМ поднесено од судија на претходна постапка на Основниот кривичен суд Скопје и времено го оддалечи од вршење на судиската функција судијата на Врховниот суд на РСМ, до правосилно завршување на кривичната постапка, извести Судскиот Совет.