Градските власти на Рио де Жанеиро објавија дека ќе забранат пристап до плажите за Нова година за да се избегне метеж среде пандемијата на коронавирусот. Забрането е движење и паркирање на возила во крајбрежната зона на градот.

Милиони луѓе вообичаено се собираат на плажите за дочек на Новата година. Минатата недела, сепак, градското собрание на Рио објави дека квартот Копакабана, каде што обично се концентрираат прославите, ќе биде целосно изолиран од 20 часот на 31 декември и во него ќе може да влезат само неговите жители.

Мерката сега го проширува својот опсег. Сите пристапни патишта до крајбрежните области, кои се протегаат на над 30 километри, ќе бидат затворени и ќе бидат поставени 40 полициски пунктови. Јавниот превоз, вклучително и метрото, ​​нема да ги опслужува населбите во близина на плажите за новогодишната ноќ. Само такси со жители на населбите ќе можат да се движат таму.

Огнометите се забранети. Градското собрание на Рио првично планираше виртуелна прослава на Копакабана со музички настапи на интернет, но пред две недели објави целосно откажување на тамошните прослави.