Екипата на Вардар доби убава вест пред стартот на новата сезона, откако компанијата „Новоматик“ официјално потврди дека ќе продолжи како генерален спонзор и во наредната натпреварувачка година.

Австриската компанија стана дел од вардаровото семејство пред една година, а според договорот за првата сезона, инвестицијата изнесуваше околу еден милион евра, средства кои одиграа клучна улога во финансиската стабилизација на клубот.

Минатата сезона Вардар успеа да ја врати позитивната атмосфера, не само што ги среди дел од своите обврски, туку и триумфираше во Купот на Македонија, што му обезбеди место во квалификациите за Конференциската лига на УЕФА.

Првиот чекор на европската сцена ќе биде дуелот со Ла Фиорита од Сан Марино, натпреварот е закажан за четврток, 10 јули, додека реваншот ќе се игра седум дена подоцна.