Канада брзо и одлучно одговори на одлуката на администрацијата на Доналд Трамп да воведе високи царини за канадскиот извоз. Канадскиот премиер Џастин Трудо најави дека Канада веднаш ќе воведе царини од 25 отсто на американски производи во вредност од 30 милијарди долари, додека дополнителни царини за уште 125 милијарди долари ќе бидат воведени во следните три недели.

„Нека биде апсолутно јасно – нема оправдување за овие постапки“, рече Трудо во острата изјава, објави Кликс.ба.

Трудо истакна дека американската администрација ги игнорирала фактите околу наводите за прекугранична трговија со фентанил, што е една од клучните причини што Трамп ги наведе како оправдување за царините.

„Помалку од еден процент од пресретнат фентанил на границата со САД доаѓа од Канада, а ние неуморно работевме на борбата против овој проблем. Инвестиравме 1,3 милијарди долари во зајакнувањето на границата и ги зголемивме напорите за борба против шверцот со дрога. Благодарение на овие мерки, заплените на фентанил од Канада се намалија за само еден месец“, изјави канадскиот премиер.

Трудо потсети и дека американските тарифи се директен удар за долгогодишните трговски односи меѓу двете земји и дека најмногу ќе ги погодат американските потрошувачи.

„Американците сега ќе плаќаат повеќе за храна, гориво и автомобили, а илјадници работни места би можеле да бидат изгубени поради оваа одлука. Овие царини не само што ѝ штетат на економијата, туку и го прекршуваат трговскиот договор за кој претседателот Трамп лично преговараше за време на неговиот последен мандат“, рече Трудо.

Канадските царини ќе останат во сила додека Вашингтон не ги повлече своите мерки.