На отворањето на пролетниот дел од сезоната шампионот Работнички Скопје го запиша вториот пораз во Првата женска одбојкарска лига и тоа повторно од Наковски Волеј, и повторно на свој терен, откако вечерва во „Борис Трајковски“ загуби со 0:3 (20:25, 18:25, 18:25).

Се чини дека малата сала во „Борис Трајковски“ им одговара на струмичанки кои во средината на ноември минатата година исто така се радуваа на гостинска победа со 3:1 и засега се единствените кои може да се пофалат дека нашле решение за играта на бранителот на титулата.

Ривалите понудија добар меч, со голема борба, но во клучните моменти од сетовите Наковски Волеј делуваше како подисциплинирано и поконкретно во играта и во поле и на мрежа.

На натпреварите од втората фаза – 2 Вардар ЕМ со 3:0 ја победи Ускана Волеј, додека Струмица жени со 3:1 се радуваа против Младост УГД.

Првото коло ќе биде комплетирано в понеделник кога играат Јанта Волеј КВ и Фит Фан Волеј.