Одбележана 100 годишнината на ФК Брегалница со ревијален меч против Црвена звезда
Во петокот на 12 септември, градот Штип беше домаќин на спектакл под рефлектори. На „Градски“ во Штип се одигра ревијален фудбалски натпревар меѓу ветераните на штипска Брегалница и легендарната белградска Црвена звезда.
Препорачано
Натпреварот беше своевидно одбележување на јубилеј на 100 години постоење на штипската фудбалска гордост. Најголемите фудбалски имиња од историјата на двата табори беа актери во еден легендарен фудбалски натпревар во градот под Исарот.
На настанот му дава посебна симболика фактот што Штип е роден град на фудбалски великан, и на Црвена звезда, легендата Драгослав Шекуларац.
Пред почетокот на пријателскиот натпревар, легендите на Црвена звезда, Бошко Ѓуровски и Станислав Караси, добија симболични подароци од домаќините.
Следеше дуел на ветерани, кој заврши со победа на Црвена звезда со резултат 4:1. Во текот на вториот ден од престојот, ветераните на Црвена звезда беа пречекани од градоначалникот на Штип, Иван Јорданов, а легендите на Црвена звезда имаа можност да ги разгледаат културните знаменитости на градот и да ја посетат црквата „Св. Никола“.
