Филмот „Превртено“ на режисерот Игор Иванов – Изи на 20 октомври имаше проекција во Кинотеката по повод 15 години од неговата премиера.

Дебитантскиот долгометражен игран филм на Иванов најпрвин беше прикажан во 2007 година на Интернационалниот филмски фестивал во Карлови Вари. Македонската премиера се случи на Интернационалниот фестивал на филмска камера „Браќа Манаки“ во Битола во 2007 година и претставува еден од последните македонски играни филмови снимени на 35мм лента.

Филмот е работен според романот „Папокот на светот“ на Венко Андоновски (кој е и косценарист на филмот). Повторното прикажување на „Превртено“ се случи во чест на починатиот македонски актер Синиша Кајевски, кој минатата година, на 39-годишна возраст прерано го заврши животот.

Токму Кајевски ја толкува една од главните улоги во филмот, заедно со Милан Тоциновски, Сања Трајковиќ, Никола Ристановски, Јовица Михајловски, Марија Кондовска, Елена Серафимовиќ, Јордан Симонов, Ѓорѓи Јолевски и Инес Бојаниќ.

Продуцент е Владимир Анастасов, директор на фотографија е Томи Салковски, монтажер е Игор Андреевски, сценографијата е на Иван Бартлинг и Игор Тошевски, костимите на Бланка Будак, а музиката ја компонираше Зоран Спасовски.

(Текстот е објавен во „Културен печат“ број 151, во печатеното издание на весникот „Слободен печат“ на 22-24 октомври 2022)