Чајот од нане е ценет ширум светот поради неговите смирувачки својства, суптилната, освежителна арома и специфичниот вкус. Не само што ги стимулира нашите сетила, туку носи и голем број потенцијални здравствени придобивки, пишува „Е-клиника“.

„Всушност, ‘нане’ е поширок поим кој вклучува неколку видови растенија, а најпознати се нането (мента) и благото нане“, вели Мелиса Азаро, диететичар од Њу Хемпшир, која не пропушта да нагласи дека чајот од нане практично не содржи калории.

Листовите од нане се природен извор на различни основни хранливи материи, според министерството за земјоделство на САД, вклучувајќи ги витамините А и Ц. Исто така, Азаро цели дека нането е богато со антиоксиданси. Сепак, треба да се каже дека консумацијата на листови од нане обезбедува повеќе антиоксиданси во споредба со чајот од нане.

Една од уникатните карактеристики на чајот од нане е присуството на ментол. Ова соединение е поврзано со различни здравствени придобивки, како што се олеснување на дигестивните проблеми и главоболки.

Здравствени придобивки и чај од нане

Подобро варење

Чајот од нане го подобрува варењето, делумно поради пеперминт. Ова органско соединение може да има спазмолитички ефекти, што значи дека ги релаксира мускулите на гастроинтестиналниот тракт и го олеснува побрзото минување на храната низ нашиот цревен систем. Затоа е корисно за луѓе кои сакаат да изгубат тежина.

Студија од 2023 година, објавена во списанието „Current Pharmaceutical Design“, известува дека компонентите на мента може да помогнат во ублажување на симптомите на синдром на нервозно дебело црево.

Здравје на респираторниот систем

Засега нема доволно докази дека чајот од нане директно влијае на здравјето на респираторниот систем, но потврдено е дека вдишувањето на мента може да дејствува како природен деконгестив, потенцијално помагајќи да се разбие слуз и секрет. Некои други својства на овој чај, исто така, можат да помогнат во ублажување на сува кашлица и болки во грлото, обезбедувајќи привремено олеснување.

Ментално здравје

Ментолот во чајот од нане има смирувачки ефекти кои можат да помогнат да се намали стресот и да релаксира, сугерира студија од 2021 година. Исто така, чајот од нане може да го подобри фокусот и когнитивната функција.

Придобивки за оралното здравје

Азаро потсетува дека чајот од нане може да помогне во освежувањето на здивот бидејќи нането има антибактериски и антигабични својства, кои можат да бидат корисни за оралното здравје. Важно е да се напомене дека иако овој чај може да придонесе за оралното здравје, тој не е замена за редовно четкање, чистење со конец и посети на стоматолог.

Потребни се повеќе истражувања за целосно да се разберат ефектите на нането врз оралното здравје.

Антимикробни и антивирусни својства

Интересно, постојат првични докази од лабораториски студии кои сугерираат дека овој чај има антивирусно дејство ефикасно против вирусот што предизвикува ковид-19, според студија од 2022 година објавена во списанието „BMC Biology“.

Сепак, чајот од нане не треба да се смета за самостоен третман за инфекции. Важно е да се има предвид дека овие својства можат да ја поддржат природната одбрана на телото и да влијаат на зајакнувањето на имунитетот, но тие не се замена за професионални медицински совети или третмани.

Хормонални придобивки

Друг значаен аспект на чајот од нане е неговото потенцијално влијание врз хормоналното здравје. Истражувањата покажаа дека нането има антиандрогени својства. Андрогените се хормони како што е тестостеронот. Ова може да биде корисно за состојби како синдром на полицистични јајници, според студија објавена во „Journal of Ovarian Research“.

Истражувањата во оваа област се недоволни и сè уште се во тек, па затоа чајот не треба да се консумира како замена за пропишаните третмани.