Министерствата за здравство, образование, земјоделие, правдa и екологија се ресорите, од кои три ќе ѝ бидат понудени на  Алијанса за Албанците да стане дел од Власта.

Премиерот Димитар Ковачевски денеска напладне закажа средба во Владата со в.д. претседателот на Алијанса за Албанците, Арбен Таравари.

Ако дојде до договор Алијанса да стане нов владин партнер и во зависност од договорот на министерствата ќе зависат и трите заменик-министерски позиции кои ќе ѝ припаднат на партијата на Таравари. Во игра се заменик-министерските функции за правад, за труд и социјала и за транспорт. Алијанса бара и 30 директорски позиции, но нема потврда колку ќе добие.

Трите владини партнери СДСМ, ДУИ и Алтернатива ќе треба да отстапат по едно министерско мест за Алијанса.

Неофицијално, за ресорот здравство со кој раководи Беким Сали од Алтернатива нема никаква дилема дека ќе биде понудено на Алијанса, ДУИ е во дилема дали да се збогува од ресорот образование или животна средина а, СДСМ меѓу правда и земјоделие.

Освен распределбата на ресори, од Алијанса брифираат дека клучно за влез во Владата ќе биде и главните програмски определби на партијата да станат дел од владината програма. Алијанса ќе инсистира при отворањето на Уставот за влез на Бугарите во преамбулата во пакет да оди и замената на формулацијата „20 отсто“ со „албански јазик“, што, како што велат, веќе е договорено. Ако стане дел од власта, Алијанса ќе настојува веднаш по влез во Владата да се донесе пакет закони од правосудсвото, поврзани со борбата против корупцијата, проекти од образованието, здравството…