Во Министерството за образование и наука денеска беше промовиран „Водич за вештачка интелигенција“, наменет за наставници, стручни соработници и ученици. Документот на 120 страници нуди опфатен преглед на историјата, видовите и современата примена на вештачката интелигенција, како и практични насоки за користење на најпознатите алатки во образовниот процес.

Министерката за образование и наука, Весна Јаневска, изјави дека со новата учебна година вештачката интелигенција официјално станува дел од наставата, како дел од процесот на дигитална трансформација. „Тоа е логичен и нужен чекор што ќе го унапреди квалитетот, ефикасноста и инклузивноста на образованието во Македонија,“ рече Јаневска.

Водичот содржи препораки за примена на вештачка интелигенција по предметите математика, природни науки, јазици и литература, историја и општествени науки – како и насоки за препознавање на можни злоупотреби и заштита на приватноста.

За наставниците и стручните соработници, документот предвидува алатки за полесно пренесување знаење и детекција на ризици, а за учениците – совети за етичко користење на ИТ технологијата во образовани цели.

Водичот ќе биде достапен во електронска форма за сите училишта, а наскоро ќе започнат и обуки за наставници преку менторска мрежа. Во моментов е отворен јавен повик за средношколски наставници, како дел од соработката со групацијата „Бреинстер“.

Деканот на Факултетот за информатика при Универзитетот „Гоце Делчев“ – Штип, Сашо Коцески, нагласи дека водичот ќе треба постојано да се надградува поради брзиот развој на технологијата. „Едукацијата е најдобра превенција – најдобро е да се едуцираат децата, но и наставниците,“ истакна Коцески.