Како и секоја година, Канскиот филмски фестивал ќе ја привлече холивудската елита на Азурниот брег, а по црвениот тепих ќе прошетаат ѕвезди како Том Круз, Роберт де Ниро, Спајк Ли, Хали Бери и многу други.

Денеска (13 мај) започнува 78. издание на овој престижен филмски фестивал и ќе трае до 24 мај, а жирито ќе го предводи француската актерка Жулиет Бинош, заедно со членовите Хали Бери, Пајал Кападија, Алба Рорвахер, Лејла Слимани, Џереми Стронг, Карлос Рејгадас, Џад Хамади и Хонг Сангсу.

Легендарниот актер Роберт де Ниро ќе биде овогодинешниот добитник на почесната Златна палма за животно дело, а наградата ќе му биде врачена на церемонијата на отворањето на фестивалот. Еден ден подоцна, тој ќе одржи јавен мастерклас.

Том Круз ќе го претстави својот најнов филм од серијалот „Невозможна мисија“ на фестивалот. Ова ќе биде негово трето појавување на Канскиот филмски фестивал, по 2022 година кога го претстави хит-филмот „Топ Ган: Маверик“.

Спајк Ли, претседателот на жирито од 2021 година, се враќа со филмот „Од највисоко до најниско“, лична интерпретација на „Помеѓу рајот и пеколот“ од Куросава, во кој глуми Дензел Вашингтон.

Тој филм ќе биде прикажан надвор од конкуренција, како и комедијата на Итан Коен „Драги, немој“, продолжението на минатогодишниот „Убавици во бегство“ и вториот дел од таканаречената „лезбејска трилогија од Б-филмови“.

Вкупно 22 филма се најавени во главната конкуренција, a oвогодинaшниот натпревар укажува на смена на генерации, но некои добро познати имиња сè уште се таму: браќата Дарден, двократни победници од Белгија, со филмот „Млади мајки“, Украинецот Сергеј Лозница со „Двајца обвинители“ и Шкотланѓанката Лин Ремзи со адаптацијата на романот „Умри, љуби“ . Вес Андерсон ќе се бори за „Златната палма“ по четврти пат со филмот „Феникиската шема“, со стандардна екипа и неколку свежи лица .

Во конкуренција се и Јоаким Трир so филмот „Сентиментална вредност“, Кели Рајхерт, американската кралица на инди-филмовите, со „Главниот мајстор“, како и филмот „Историја на звукот“, во режија на Оливер Херманус.

Оваа година, во натпреварот има дури седум жени режисерки — една третина од вкупниот број натпреварувачи, што е значаен чекор кон родовата еднаквост. Најголемиот успех меѓу нив, барем кога станува збор за Кан, го постигна Жулија Дукорно, чиј филм „Титан“ ја освои „Златната палма“ во 2021 година. Сега таа се враќа со филмот „Алфа“.Ари Астер исто така ќе дебитира во Кан со филмот „Едингтон“.

Во категоријата посветена на млади автори, Кристен Стјуарт ќе се претстави, овој пат како режисерка со филмот „Водна хронологија“. И нејзината колешка Скарлет Јохансон седна на режисерската фотелја за прв пат, а нејзината продукција „Елеонор Велика“ , исто така, ќе биде во истата селекција.

Харис Дикинсон, познат по улогата во филмот „Бејбигерл“, сега режира и глуми во филмот „Урчин“, а за првпат, во програмата ќе биде прикажан и нигериски филм – „Сенката на мојот татко“.

Покрај гламурот и познатите лица, вистинската сила на Кан лежи во неговата способност да извлече од сенките скапоцени камења што го освојуваат светот, пишува Си-ен-ен. Оваа година, во трката за официјалната програма имаше речиси 3.000 филмови, а имињата беа додавани до последниот момент.