Околу 8О лица ангажирани преку агенција за привремени вработувања, од нив 46 оперативци и 37 административни работници, нема да продолжат да работат во „Комунална хигиена“ затоа што претпријатието нема потреба од нивниот понатамошен ангажман. Нивните договори се истечени на 4 ноември, а нивниот ангажман е прекинат по анализата која ја направиле раководителите. Ова го посочи на денешната прес конференција директорката на ЈП „Комунална Хигиена“, Косана Мазнева.

Таа нагласи дека голем дел од овие лица не биле редовни и не биле присутни на своите работни места како што треба. Што се однесува на тоа дали лицата на кои ќе им биде прекинат договорот се Албанци, Македонци, Срби, Власи, Турци, Мазнева рече дека сака да стави ред во „Комунална хигиена” независно од партиската или етничката припадност.

Ние имаме 1.118 редовно вработени лица и 287 лица кои се ангажирани преку Агенцијата за привремени вработувања. Отприлика 80 лица треба да си заминат, односно тоа се лица на кои што нема да им се продолжи договорот, затоа што реално немаме потреба од нив, тоа е реално оптоварување за претпријатието. Од нив 46 лица се оперативци и 37 се административни работници. Овие 287 лица го чинат претпријатието 11 милиони денари во услови на енергетска и економска криза – рече Мазнева.

На прашањето зошто биле ангажирани ако претпријатието нема потреба од нив, директорката објасни дека дел од редовните вработени лица во меѓувреме отишле во пензија, дел се отидени на неплатено отсуство, дел се заминати на подолготрајно боледување, па претпријатието останува без одредени кадри, па е принудено некогаш да ангажира дополнителни луѓе, но со ниту еден закон не е обврзувачки дека треба да останат како вработени во претпријатието.

Таа информира дека откако е дојдена на директорксата функција во претпријатието има доставено преку двесте опомени кон редовно вработени лица и кон оние кои што се ангажирани преку Агенцијата за привремени вработувања со укажување да внимаваат на дисциплината на работното место.