Обвинителството постапува по кривичната пријава за поранешната директорка на Општа болница Дебар, Севдије Коџа за наводно лажен сертификат за познавање англиски јазик, велат оттаму за „Слободен печат“. Кривичната пријава за неа МВР до Обвинителството ја поднесе уште во февруари, но до денес нема јавнообвинителска одлука.

Во меѓувреме, кривичната пријава за наводно лажен сертификат за познавање англиски јазик не ја спречи Коџа повторно да стане директорка во болницата, откако премина од ДУИ во коалицијата Вреди. За трансферот на Коџа во новата коалиција извести градоначалникот на Тетово, Биљал Касами на Фејсбук откако министерот за здравство Арбен Таравари веќе ја назначи за директорка.

Известувањето за нејзината старо-нова функција дојде во група со уште деветмина нови раководители на болници во државата. Коџа за „Слободен печат“ рече дека овојпат не доставила никаков сертификат за познавање англиски јазик до Министерството, туку дека доставила уверение за неосудуваност за подрачјето на Дебар. Обвинителството пак кое ја процесуира кривичната пријава против неа е скопското.

– Не знам зошто така се пишуваше за мене во медиумите. Минатиот октомври бев на едукација во Сингапур со таа диплома и сè беше во ред. Така што не знам зошто така се пишуваше за мене во медиумите, немам добиено никаква пријава на мојата адреса – изјави докторката и нова директорка за „Слободен печат“ пред три дена.

Од МВР велат дека тие имаат поднесено кривична пријава и предметот е во Обвинителството.

„Пријавената С.К. вработена во Општа болница Дебар, набавила лажен меѓународен сертификат за познавање на англиски јазик, издаден од училиште за јазици од Република Бугарија. С.К. го употребила сертификатот за познавање англиски јазик при аплицирање на конкурс за именување директор на ЈЗУ Општа болница Дебар, по што од министерот за здравство била именувана за вршител на должноста – директор на ЈЗУ Општа болница Дебар“, пишува во билтенот на МВР од 14 февруари годинава.

На Клиниката за урологија на Клиничкиот центар „Мајка Тереза“, пак, за нов директор од вчера е поставен хирургот Башким Шабани. Во јавноста пред еден месец имаше голема реакција кога 32-годишна негова пациентка почина после операција за вадење камен од бубрегот. Таравари најави дека ќе биде формирана стручна комисија за да се испитаат причините за смртта, а денеска потврди дека станувало збор за компликација кај пациентката, а не за лекарска грешка. Семејството на младата жена пак, нема вакви информации. Сопругот не ги добил ни резултатите од обдукцијата, кои по процедура треба да се испратат на КАРИЛ, а не кај него.

Нов директор на Центарот за јавно здравје, Скопје е Муамет Демири, а на штипската Клиничка болница е Владко Захариев, на Општата болница Кичево Маја Цветановска Трајковска, на Општата болница Струга  Владимир Бунчевски а на Здравствениот дом Струга е Арбен Лабеништа.

Жан Лозановски е назначен за директор на Психијатриската болница Демир Хисар, Херољинд Сакипи на Центарот за јавно здравје Куманово, Благоја Китановски на Специјализираната болница за превенција, лекување и рехабилитација на хронични респираторни неспецифични и алергиски заболувања – Отешево.

СКАНДАЛ: Фатмир Меџити ја разрешил доктор Милена Стевановиќ зашто „ѝ истекол сертификатот за англиски“ од Кембриџ кој важи доживотно

32-годишна жена почина на Клиника после операција за вадење камен од бубрегот