По синоќешниот фудбалски натпревар меѓу Шкендија и Карабах, одржан на арената „Тодор Проески“ во Скопје, Основното јавно обвинителство отвори истражна постапка поради скандирања со националистичка и етничка содржина, вклучувајќи повици за „Голема Албанија“, „Илирида“ и „Чамерија“, кои се слушнаа од трибините на кои имаше неколку илјади гледачи.

И покрај апелите на Фудбалската федерација на Македонија (ФФМ) и раководството на клубот Шкендија за спортско и фер навивање, дел од публиката одби да ги почитува повиците, со што, според надлежните институции, е нарушен јавниот ред и мир и се поттикнуваат етнички тензии.

Од Министерството за внатрешни работи (МВР) информираа дека постапуваат по случајот врз основа на видео и фотодокументација, и во координација со обвинителството се преземаат чекори за идентификација на инволвираните.

„Постапуваме со јавниот обвинител за целосно расчистување на случајот. Отпочната е постапка за идентификација на лицата што учествуваа во инцидентот“, соопштија од СВР Скопје.

Натпреварот беше следен и од високи државни функционери, меѓу кои вицепремиерот Изет Меџити, претседателот на Собранието Африм Гаши, министерот за економија Бесар Дурмиши, како и партиските лидери Али Ахмети и Арбен Таравари. Претседателот на Собранието, кој пред неколку дена јавно ги осуди ксенофобичните скандирања во Куманово, овој пат на својот профил на Фејсбук упати честитка до навивачите, оценувајќи дека биле „достоинствен пример за националните вредности“.

Претседателката на државата, Гордана Сиљановска Давкова скандирањето го нарече „срамна реприза на кумановската трагична приказна“.

„Само со заедничка, доследна и бескомпромисна битка со шовинистичките изблици, без оглед чии се, ќе градиме здраво општество“, порача Сиљановска-Давкова, повикувајќи на одговорност и единство во заштитата на граѓанскиот соживот.

Претседателката за националистичките скандирања: Реприза на кумановската трагична приказна

Реакција пристигна и од Хелсиншкиот комитет за човекови права, од каде остро ги осудија националистичките извици, предупредувајќи дека ваквите испади не само што го нарушуваат спортскиот дух, туку и ја поткопуваат меѓуетничката кохезија во земјата.

„Повиците за ‘Голема Албанија’, ‘Чамерија’ и ‘Илирида’ се далеку од спортски израз и претставуваат потенцијал за поттикнување омраза и меѓуетнички конфликти“, се наведува во реакцијата на Хелсиншкиот комитет.

ФФМ уште пред почетокот на натпреварот апелираше до публиката да се воздржи од навреди и провокации, повикувајќи на почитување на спортските и човечките вредности.

Обвинителството веќе води истрага и за слични скандирања на кошаркарскиот натпревар Македонија – Романија во Куманово, каде неколку лица веќе беа повикани на информативен разговор.