Обожавателите на „Оејзис“ изгубиле вкупно повеќе од два милиони фунти (околу 2,3 милиони евра) поради измамите на социјалните мрежи, особено на Фејсбук, верувајќи дека купувале билети за концерт по повторното обединување на бендот, според британската банка „Лојдс“.

„Банката проценува дека најверојатно ќе има најмалку 5.000 жртви во Велика Британија откако билетите биле пуштени во продажба и дека се изгубени над 2 милиони фунти поради измамниците“, се вели во соопштението на банката објавено во средата. Банката ги доби овие податоци врз основа на сопствените клиенти, а овие податоци потоа беа проширени на остатокот од Британија.

Браќата Галагер, Лијам и Ноел, на крајот на август објавија дека повторно го формираат култниот бенд „Оејзис“, 15 години по нивното разделување и дека ќе одржат серија концерти во Британија и Ирска, што предизвика голема возбуда.

Но, хаотичната продажба на билети за концертите во Кардиф, Манчестер, Лондон, Единбург и Даблин, кои се распродадени во ист ден, предизвика гнев и фрустрација кај купувачите. Тие се соочија со прекини на пренатрупани платформи за продажба и динамични, повисоки цени во последен момент.

Потоа, измамите насочени кон разочараните фанови се ширеле на социјалните мрежи преку лажни реклами, понекогаш нудејќи билети по намалени цени, велат од банката.

„Лојдс“ забележа околу 1.000 жртви меѓу своите клиенти, кои изгубија во просек по 436 фунти. Еден од нив бил измамен со сума 1.700 фунти. Девет од десет луѓе биле измамени на социјалните мрежи на „Мета“, од кои повеќето се преку Фејсбук.

„Фактот што толку многу случаи започнуваат со лажни реклами на социјалните мрежи, честопати во спротивност со политиките на платформите, ја нагласува важноста овие компании да преземаат поригирозни мерки“, рече Лиз Зиглер, директор за спречување измами во „Лојдс“.