
Обложувалниците ги објавија коефициентите: Познати се фаворитите за „Златната топка“
Фудбалската сезона 2024/2025 е зад нас, а со нејзиниот крај започнуваат и пресметките околу тоа кој ќе го добие најпрестижното индивидуално признание, Златната топка. Официјалната церемонија ќе се одржи на 22 септември во Париз, но обложувалниците веќе ги објавија своите први прогнози.
Препорачано
На врвот на листата фаворити се наоѓа напаѓачот на Пари Сен Жермен, Осман Дембеле. Французинот одигра блескава сезона и беше незаменлив дел од тимот на ПСЖ, кој ги освои сите можни домашни и европски трофеи, Лига 1, Купот на Франција, Суперкупот и Лигата на шампионите. Дембеле сезонава запиша 49 настапи, постигна 33 гола и додаде 15 асистенции, што му донесе коефициент 1,40 со што е огромен фаворит.
На второто место, со коефициент 3,75, се наоѓа „чудото од дете“ Ламин Јамал. Младиот ас на Барселона имаше извонредна сезона со 18 гола и 25 асистенции на 55 настапи. Со Каталонците ја освои Ла Лига, Купот на Шпанија и Суперкупот, а според многумина ова е само почеток на една голема кариера.
Неговиот соиграч Рафиња има дури и подобри индивидуални бројки, 34 гола и 25 асистенции на 57 натпревари, но обложувалниците сепак го ставаат зад Јамал, со коефициент 12.
Со исти шанси, според обложувачите, е и ѕвездата на Ливерпул, Мохамед Салах. Египќанецот ја предводеше својата екипа до титулата во Премиер лигата, при што на 52 натпревари постигна 34 гола и забележа 23 асистенции. Неговата улога во тимскиот успех е неспорна, но тоа не беше доволно да се најде меѓу топ тројцата фаворити.
Петтото место на оваа престижна листа му припаѓа на соиграчот на Дембеле во ПСЖ, Квича Кварацхелија за кого има коефициент од 15.