Актерската екипа за четирите претстојни биографски филмови за „Битлси“ е официјално објавена. Харис Дикинсон ќе го игра Џон Ленон, Пол Мескал ќе го игра Пол Макартни, Бери Кеоган ќе го игра Ринго Стар, а Џозеф Квин ќе го игра Џорџ Харисон.

Режисерот Сем Мендес потврди дека сите четири филма ќе бидат прикажани во април 2028 година, пишува „Гардијан“.

„Не снимаме само еден филм, правиме четири. Можеби ова е можност да ги разбереме малку подобро“, рекол Мендес.

Тој ги нарече и најважниот бенд на сите времиња.

„Со години се обидував да снимам филм за Битлси, но на крајот се откажав. Приказната беше преголема за еден филм, а јас не сакав да снимам серија. Мора да има начин да се раскаже епска приказна за новата генерација“, рекол Мендес и додаде дека има уште многу да се истражува за нив.

Овој проект го има благословот на Мекартни и Стар и семејствата на Џон Ленон и Џорџ Харисон, а тоа е првпат тие да имаат дозвола и од „Епл корпс“, компанијата која управува со Битлси.

Мендес исто така е режисер и добитник на Оскар, а некои од неговите најпознати филмови се  „Скајфол“ за Џејмс Бонд,  „Американска убавина“ и „1917“.

Битлси се формирани во 1960 година, а се распаднаа во 1970 година. Тие го сменија текот на музичката историја со нивните хитови, а за нив се снимени и бројни документарни филмови.