Само неколку дена по 81. доделување на наградите Златен глобус објавени се номинациите за наградите САГ 2024 година. Доделувањето на наградите на Здружението на актери е една од најважните церемонии во Холивуд.

Наградите САГ внимателно се следат бидејќи актерите ја сочинуваат најголемата група гласачи за Оскарите, главната награда на филмската индустрија што ќе се додели во март.

Филмските остварувања кои постигнаа огромен успех на кино благајните, „Барби“ и „Опенхајмер“, освоија по четири номинации за наградите, во новата битка пред Оскарите. Меѓу номинациите е и онаа за најдобра актерска екипа, а во таа категорија ќе се борат со актерските екипи на филмовите „Убијци на Цветната месечина“, „Американска фикција“ и „Виолетова боја“.

Кога станува збор за телевизиските продукции, серијата „Наследници“, која како и „Опенхајмер“ постигна голем успех на Златните глобуси, води со пет номинации. Следуваат „Тед Ласо“, „Мечката“ и „Последниот од нас“, кои добија по четири номинации.

Најдобриот телевизиски ансамбл во категоријата комедија ќе биде избран меѓу „Мечката“, „Тед Ласо“, „Само убиства во зградата“, „Абот основно“ и „Бери“.

Компанијата „Ворнер брос. дискавери“ освои повеќе номинации од која било друга компанија со дури 20 номинации за нејзините наслови, вклучувајќи ги „Последните од нас“, „Наследници“, „Виолетова боја“ и „Барби“. По нив следат „Нетфликс“ со 12 и „Епл“ со 11 номинации.

Гласачите ја прескокнаа ѕвездата на „Цветна месечина“ Леонардо Дикаприо, актерот не е меѓу номинираните во категоријата за најдобра главна улога. Грета Ли исто така беше изоставена од листата иако нејзината улога во „Минатите животи“ досега доби одлични критики.

Меѓу номинираните во категоријата најдобра споредна женска улога имаше место и за Пенелопе Круз („Ферари“), која беше заобиколена од другите асоцијации во номинациите.

Доделувањето на САГ ќе се одржи на 24 февруари и ќе се емитува во живо на платформата Нетфликс.

Листа на номинации

Најдобра актерска екипа во филм

• „Американска фикција“
• „Барби“
• „Виолетова боја“
• „Убијци на Цветната месечина“
• „Опенхајмер“

Најдобар актер

• Бредли Купер – „Маестро“
• Колман Доминго – „Растин“
• Пол Џамати – „Оние што остануваат“
• Килијан Марфи – „Опенхајмер“
• Џефри Рајт – „Американска фикција“

Најдобра актерка

• Анет Бенинг – „Нјад“
• Лили Гладстон – „Убијци на цветната месечина“
• Кери Малиган – „Маестро“
• Марго Роби – „Барби“
• Ема Стоун – „Кутри нешта“

Најдобар актер во драмска серија

• Брајан Кокс – „Наследници“
• Били Крудап – „Утринско шоу“
• Киеран Калкин – „Наследници“
• Метју Мекфадиен „Наследници“
• Педро Паскал – „Последниот од нас“

Најдобра актерка во драмска серија

• Џенифер Анистон – „Утринско шоу“
• Елизабет Дебицки – „Круната“
• Бела Ремзи – „Последниот од нас“
• Кери Расел – „Дипломат“
• Сара Снук – „Наследници“

Целата листа на номинации може да ја погледнете ТУКА.