Меѓународната федерација за дијабетесот (ИДФ) и Светската здравствена организација (СЗО) во 1991 година за првпат го одбележаа 14 ноември како Светски ден на дијабетесот. Ова имаше за цел да ја разбуди свеста кај луѓето за дијабетесот, честа болест, чиј број заболени денес изнесува 537 милиони лица низ светот, со тенденција за пораст во наредните две децении кога, според статистиката, би достигнала до 643 милиони.

Во 1920 година Фредерик Бентинг и Чарлс Бест со своето револуционерно откритие на инсулинот ја променија прогнозата на оваа дотогаш смртоносна болест. Во таа чест, роденденот на Фредерик Бентинг, 14 ноември, е официјално прогласен за ден на дијабетесот. Знакот на едноставен син круг бил усвоен од Здружението за дијабетес како официјално лого на Светскиот ден на дијабетесот. Кругот симболизира живот и здравје, а сината боја го симболизира небото, кое ги обединува сите луѓе на светот и воедно е бојата на знамето на ООН.

Поради таа причина, разговаравме со нутриционистката Маја Велковска, чии совети ќе ви помогнат во изборот на природни намирници со антидијабетичен ефект, правилна подготовка и распоред на оброците.

Дијабетесот е хронично заболување што се манифестира со покачени нивоа на гликемија (шеќер) во крвта. Хипергликемијата (покаченото ниво на гликемија во крвта) е предизвикано поради тоа што телото не може да создаде доволно инсулин или поради неможноста веќе создадениот инсулин да се искористи соодветно (инсулинска резистенција), вели Маја.

Начинот на живот (физичката активност, соодветен сон, одмор, грижа за менталното и духовното здравје итн.), и исхраната во голема мера можат да помогнат во подобро регулирање на гликемијата во крвта кај дијабетичарите, па затоа денеска, по повод Светскиот ден на дијабетесот, Маја со нашите читатели споделува неколку совети на оваа тема:

1. Дијабетичарите треба да консумираат храна и оброци со низок до среден гликемиски индекс, бидејќи оваа храна и оброци претставуваат постабилни и подолготрајни извори на енергија и шеќери, што значи дека нема да имате големи растови на шеќерот во крвта и големи падови во шеќерот во крвта. Ова практично значи дека секој оброк треба да биде комбинација од растителни влакна, протеини, масти и јаглехидрати, и дека намирниците што содржат најголеми количини прости шеќери и имаат највисок гликемиски индекс треба да се избегнуваат, или да се употребуваат во мали количини и добро комбинирани со други намирници.

2. Употребувајте природни намирници со антидијабетичен ефект. Веќе е покажано дека некои намирници имаат антидијабетичен ефект, односно по некој механизам, помагаат во подобро регулирање на гликемијата во крвта. Такви намирници се: ѓумбир, цимет, бобичесто овошје, ленено семе, куркума итн.

3. Употребувајте леб од житарки што имаат понизок гликемиски индекс и кои содржат помали количини прости шеќери. Јачменовото и ’ржаното брашно се добра замена за пченичното брашно, а исто така, може да се користи и хелдино брашно. Доколку самите си подготвувате леб, во него можете да додадете и никулци и трици од житарки, како дополнителни извори на растителни влакна, или семиња како што е лененото семе.

4. Направете си добар распоред на оброците, добро е да имате 2 до 3 оброци во текот на денот, и по потреба 1-2 ужинки. Исто така, се препорачува кратка прошетка по поголемите оброци во текот на денот, или по оброците што содржат поголеми количини јаглехидрати, бидејќи физичката активност ќе ви помогне во метаболизирање на гликозата што сте ја апсорбирале од оброкот/храната.

5. Исхраната треба да ви биде богата со овошје, зеленчук, интегрални житарки, мешунки, здрави извори на протеини (јатки, семки, риба, белки од јајца, урда, живинско месо) и растителни ладно цедени масла (какви што се маслиновото и лененото масло). А исхраната треба да ви биде сиромашна со преработени производи, извори на транс масти, рафинирани масла и масти, слатки, бел кристален шеќер, производи што содржат шеќер, гликоза, гликозно-фруктозен сируп итн.

6. Особено треба да внимавате да внесувате доволни количини од следните нутриенти, кои се важни за правилен метаболизам на гликемијата во телото: хром, витамин Д, витамин Б12, витамин Б1, магнезиум, јод, цинк.

Следете ги советите на Маја на инстаграм – профилот:  the_healthier_you_ и блогот thehealthieryou.mk.

Рецепт на нутриционистката Маја Велковска за дијабетичари: Интегрални палачинки со брокула