Ново правило за странски студенти во Соединетите Американски Држави
Владата на САД предложи ново правило кое ќе го ограничи времетраењето на студирањето на странски студенти во Соединетите Американски Држави.
Препорачано
Правилото се однесува на визи за странски студенти, програми за културна размена и странски медиуми, а доаѓа во време кога администрацијата презеде агресивни мерки против студентските визи и продолжува да се справува со студентите за кои вели дека го прекршиле законот.
Странските студенти кои имаат виза F моментално можат да останат во САД 60 дена по завршувањето на студиите, а новото правило предвидува фиксен период „за времетраењето на програмата во која учествуваат, но не повеќе од четири години“, според CNN.
Новото правило, исто така, го одредува периодот на престој за странски медиуми на 240 дена, но остава можност тој да се продолжи за истиот период.
„Предолго време, претходните администрации им дозволуваа на странските студенти и другите носители на визи да останат во САД практично на неодредено време, претставувајќи безбедносни ризици, чинејќи ги даночните обврзници огромни суми пари и ставајќи ги американските граѓани во неповолна положба“, се вели во соопштението на Министерството за внатрешни работи.
Во него се забележува дека новото правило „ќе ја прекине таа злоупотреба еднаш засекогаш со ограничување на времето што одредени носители на визи можат да останат во САД, олеснувајќи ѝ на федералната влада правилно да ги следи странските студенти и нивното однесување“.
Стејт департментот, исто така, во последните месеци ги заостри правилата и прописите за проверка на студентските визи, што резултираше со откажување на повеќе од 6.000 визи затоа што студентите го пречекориле рокот или го прекршиле законот.
Како што е наведено во соопштението, „огромното мнозинство“ од тие прекршоци се однесуваат на случаи на напад, возење под дејство на алкохол, кражба и „поддршка на тероризам“.
Во јуни, Стејт департментот им наложи на амбасадите и конзулатите да ги проверуваат кандидатите за студентски визи за евентуални „непријателски ставови кон нашите граѓани, култура, влада, институции или основачки принципи“.
