Кога станува збор за развој на третмани и евентуални излекувања на болести, можноста за рано и прецизно дијагностицирање на состојбата прави огромна разлика, а научниците сега развија брз, проверен метод на идентификување на луѓе со Паркинсонова болест.

Тестот може да се спроведе за само три минути по земањето на брис од кожа. Брисот се анализира на промени во хемиската мешавина на себумот, природно восочно масло што го произведува кожата, кое претходно се поврзувало со Паркинсоновата болест, пишува „Сајенс алерт“.

Во моментов не постои конечен, дефинитивен тест за Паркинсонова болест. Специјалистите ги гледаат симптомите, историјата на болести, резултатите од долготрајниот физички преглед, а во некои случаи и скенирање на мозокот за да ја дијагностицираат состојбата.

– Овој тест има потенцијал за значајно подобрување на дијагнозата и лекувањето на луѓето со Паркинсонова болест – вели неврологот д-р Монти Силвердејл од Универзитетот во Манчестер во Велика Британија.

Новиот тест се темели на работата што ја спровеле истражувачите со пациентката Џој Милн од Шкотска, која има наследна хиперосмија, односно зголемена чувствителност на мириси. Откако забележала дека нејзиниот сопруг развива мошусен мирис многу години пред официјално да му биде дијагностицирана Паркинсонова болест, откриено е дека Милн буквално може да ги намириса знаците на болеста кај луѓето, пренесува „Сајенс алерт“.

Ова го довело тимот до себумот, кој е поврзан со ендокриниот систем и ја одржува кожата влажна. Уште во 2019 година, некои од истите истражувачи идентификуваа како хемиската мешавина на себум се променила кај поединец откако била присутна Паркинсоновата болест.

На земениот брис се прави анализа на масена спектрометрија за да се види молекуларниот состав.

„Кога го правиме ова, наоѓаме повеќе од 4.000 уникатни соединенија од кои 500 се различни меѓу луѓето со Паркинсонова болест во споредба со контролните учесници“, вели хемичарот д-р Депанјан Саркар од Универзитетот во Манчестер.

Тоа што тестот е неинвазивен и толку брз во однос на генерирањето резултати се позитивни знаци, иако научниците допрва треба да покажат дека можат да го направат да работи надвор од лабораториските услови.

Паркинсоновата болест во моментов е најбрзо растечката невролошка болест која постои и овој раст ќе продолжи. Додека научниците работат напорно за да најдат лек, постојат начини за забавување или управување со текот на болеста и токму тука раната дијагноза може да биде исклучително важна.

– Исклучително сме возбудени поради овие резултати кои нè доближуваат до изработувањето на дијагностички тест за Паркинсонова болест кој би можел да се користи во клиниката – вели хемичарката Пердита Баран од Универзитетот во Манчестер.