Животните можат да реагираат на звуците што ги создаваат растенијата, според ново истражување од Универзитетот во Тел Авив, што укажува на постоење на претходно непозната комуникација во природата.

Во студија објавена во списанието „eLife“, израелските научници откриле дека женските молци избегнуваат да положат јајца на растенијата домати кои емитуваат ултразвучни сигнали поврзани со стресот на растенијата, како што е дехидрацијата, пишува „Би-би-си“.

Овие звуци се нечујни за луѓето, но ги детектираат многу животни, вклучувајќи инсекти, лилјаци и некои цицачи.

Новото истражување сугерира дека животните реагираат на звуците што ги испуштаат растенијата, отворајќи ја можноста дека меѓу нив може да постои невидлив екосистем.

Тимот беше првиот што пред две години покажа дека растенијата испуштаат звуци кога се вознемирени или нездрави.

Звуците се надвор од опсегот на човечкиот слух, но можат да ги детектираат многу инсекти, лилјаци и некои цицачи.

„Ова е прва демонстрација на животно кое реагира на звуци произведени од растение“, рече професорот Јоси Јовел од Универзитетот во Тел Авив.

„Ова е шпекулација во оваа фаза, но можно е сите видови животни да донесуваат одлуки врз основа на звуците што ги слушаат од растенијата, како на пример дали да опрашуваат или да се кријат во нив или да го јадат растението.“

Истражувачите спроведоа серија внимателно контролирани експерименти за да се осигурат дека молците реагираат на звукот, а не на изгледот на растенијата.

Сега ќе ги испитаат звуците што ги испуштаат различните растенија и дали другите видови донесуваат одлуки врз основа на нив.