Пеењето на вашето бебе може значително да го подобри неговото расположение. Ова го покажува нова студија на научници од Медицинскиот факултет на Универзитетот Јеил.

Низ целиот свет и во различни култури, пеењето на бебињата е инстинктивна акција. Сега новите откритија покажуваат дека пеењето е лесен, безбеден и бесплатен начин за подобрување на менталната благосостојба на новороденчето.

Бидејќи подобреното расположение во раното детство е поврзано со подобар квалитет на живот и за родителите и за бебињата, тоа е од корист за целото семејство, според соопштението од Медицинскиот факултет на Универзитетот Јеил.

– Пеењето е нешто што секој може да го прави, а повеќето семејства веќе го прават. Покажуваме дека оваа едноставна практика може да доведе до вистински здравствени придобивки за бебињата – рече Еун Чо, доцент на Јеил.

– Не мора секогаш да се фокусираме на скапи, комплицирани интервенции кога постојат други кои се подеднакво ефикасни и лесни за усвојување – додаде Лидија Јурдум, докторант по психологија на Универзитетот во Амстердам и коавтор на студијата објавена во „Чајлд Девелопмент“ (Child Development).

Во новата студија биле опфатени 110 родители и нивните бебиња, од кои повеќето биле помлади од четири месеци. Истражувачите случајно ги поделиле родителите во две групи, охрабрувајќи ја едната група почесто да им пее на своите бебиња преку учење на родителите нови песни, обезбедување на видеа со упатства за караоке и книги со песни прилагодени за бебиња и испраќање неделни билтени со идеи за вклучување на музиката во секојдневните рутини.

Четири недели, овие родители добивале анкети на своите паметни телефони во случајни интервали во текот на денот. Родителите одговарале на прашања во врска со расположението на бебето, неговата нервоза, времето поминато во смирување, расположението на старателот и фреквенцијата на музичко однесување. На пример, од родителите било побарано да оценат колку позитивно или негативно било расположението на нивното бебе во последните два до три часа пред да ја добијат анкетата. Контролна група од 56 родители, исто така, добила идентична интервенција четири недели по почетниот експеримент.

Истражувачите откриле дека родителите биле во можност успешно да го зголемат времето што го поминувале пеејќи им на своите бебиња.

– Кога ќе ги замолите родителите да пеат повеќе и ќе им обезбедите многу основни алатки за да им помогнете по патот, тоа е многу природно за нив – рече Јурдумова.

Родителите не само што пееја почесто, туку избираа да користат музика и во еден конкретен контекст: смирување на своите бебиња кога беа пребирливи.

– Не им рековме на родителите: „Мислиме дека треба да му пеете на вашето бебе кога е нервозно“, но тоа е она што тие самите го направија – рече Самуел Мер, вонреден професор во Центарот за студии за деца и директор на Музичката лабораторија, како и еден од авторите на студијата.

Одговорите на анкетата покажаа дека зголеменото пеење довело до мерливо подобрување на целокупното расположение на бебињата, во споредба со оние во контролната група – со други зборови, родителите кои пееле повеќе го оцениле расположението на своите бебиња како значително подобро. Важно е да се напомене дека подобреното расположение било забележано воопшто, а не само како непосредна реакција на музиката.

Иако пеењето не влијаело значително врз расположението на лицата што се грижат за нив во оваа студија, Мир верува дека може да има последователни здравствени ефекти кај младите семејства.

– Секој родител знае дека расположението на бебето влијае на сè околу него – додаде тој.