Новиот извештај покажа: Порастот на нивото на морето е закана за 1,5 милиони Австралијци
Дури 1,5 милион Австралијци кои живеат во крајбрежните области ќе бидат загрозени од порастот на нивото на морето до 2050 година, покажува најновиот голем климатски извештај.
Препорачано
Првата Национална проценка на климатските ризици за Австралија предвидува сè почести и посериозни климатски опасности како што се поплави, циклони, топлотни бранови, суши и шумски пожари, пишува Би-би-си.
„Австралијците веќе денес живеат со последиците од климатските промени, но јасно е дека секој степен на затоплување што сега ќе го спречиме ќе им помогне на идните генерации да ги избегнат најлошите влијанија во годините што доаѓаат“, изјавил министерот за климатски промени, Крис Боуен.
Три сценарија за глобално затоплување
Извештајот анализираше три можни сценарија за глобално затоплување: пораст на температурата над 1,5 степени Целзиусови, над 2 степени Целзиусови и над 3 степени Целзиусови. Како што се наведува, Австралија веќе достигна затоплување над 1,5 степени Целзиусови. Се предупредува дека при затоплување од 3 степени Целзиусови, смртноста поврзана со топлина во Сиднеј би можела да се зголеми за повеќе од 400 отсто, додека во Мелбурн речиси би се тројно зголемила.
Експертите утврдија дека ниту една австралиска заедница нема да биде имуна на климатските ризици, кои ќе бидат „каскадни, сложени и истовремени“.
Економски и здравствени последици
Се предупредува на поголем број смртни случаи поврзани со топлотни бранови, полош квалитет на водата поради големи поплави и шумски пожари, како и пад на вредноста на недвижностите за дури 611 милијарди австралиски долари.
До 2050 година, бројот на крајбрежни заедници сместени во „високоризични и многу високоризични области“ во Австралија значително ќе се зголеми. Ако бројот на жители остане на сегашното ниво, тоа значи дека повеќе од 1,5 милиони луѓе ќе бидат директно загрозени.
Особено загрозени се областите на северот на Австралија, оддалечените заедници и надворешните предградија на големите градови.
„Тоа ќе создаде притисок врз здравството, критичната инфраструктура, природните видови и екосистеми, како и врз примарните индустрии“, се наведува во извештајот, со забелешка дека и службите за итни случаи ќе се соочат со дополнителни предизвици.
„Една работа што е многу јасна од оваа климатска проценка е дека целата наша земја има многу вложено. Трошокот за неактивност секогаш ќе го надмине трошокот за делување“, рекол Боуен.
