Новинарите на „Гласот на Америка“ (ВОА) можат да почнат да се враќаат во своите канцеларии следната недела, според електронската пошта испратена до вработените од Министерството за правда.

Гласот на Америка ќе продолжи со работа по речиси двомесечна пауза, откако администрацијата на американскиот претседател Доналд Трамп го суспендираше медиумот со извршна наредба на 14 март, која беше насочена кон повеќе федерални агенции и канцеларии, вклучувајќи ја и Американската агенција за глобални медиуми (USAGM), матичната организација на Гласот на Америка финансирана од државата.

Федералниот судија Ројс Ламберт издаде привремена забрана на 22 април со која ѝ наложи на администрацијата да го врати „Гласот на Америка“, тврдејќи дека одлуката за негово затворање веројатно била неуставна.

Помошничката на американскиот обвинител Бренда Гонзалез Хоровиц потврди до адвокатите што ги застапуваат вработените во Гласот на Америка дека персоналот се враќа на работа.

Во истата електронска пошта се потврдува и дека сите вработени повторно добиле пристап до системите.

„USAGM моментално очекува персоналот постепено да почне да се враќа во канцелариите следната недела, со оглед на безбедносните проблеми, достапноста на простор и опремата“, напиша Гонзалез Хоровиц во е-пошта до која дојде Политико.

„Гласот на Америка“ постои повеќе од 80 години и има мисија да известува „точно, објективно и сеопфатно“ и „јасно и ефикасно да ги презентира политиките на Соединетите Американски Држави“, според неговата повелба.