Европската унија (ЕУ) размислува за воведување на забрана за нови возила со внатрешно согорување (бензинци и дизели) во рамки на фирмените флоти и возилата за изнајмување, почнувајќи од 2030 година. Иако некои медиуми веќе пренесоа дека постои конкретен план, Европската комисија сe уште не го потврдила тоа како официјален предлог, туку појасни дека иницијативата е во рана фаза на разгледување и сe уште се врши проценка на нејзината изводливост.

Според извештаите на европските медиуми, кои се повикуваат на анонимни извори од ЕУ кругови, ваквата обврска би опфатилa околу 60 % од сите нови возила продадени во ЕУ, бидејќи возилата во сопственост на фирми и рентакар-автомобилите сочинуваат значителен дел од вкупнaтa продажба. Претпоставениот план предвидува компаниите и агенциите целосно да преминат на користење само електрични автомобили (EV) од 2030 година. Следната фаза би вклучувала официјално претставување на законски предлог и воведување во парламентарната процедура на ЕП и Советот на ЕУ. Предлогот би можел да биде официјално претставен од страна на Комисијата веќе во текот на оваа есен, како дел од поширокиот законодавен пакет.

Оваа идеја наиде на жестоки критики и од германски политички претставници и од водечки актери во автомобилската индустрија. Германскиот канцелар Фридрих Мерц нарече планот „деструктивен“ за индустријата, предупредувајќи дека фокусот на една технологија (електрична), која во моментот не е подготвена да замени класичните мотори во целина, може да ја подријат конкурентноста и производствениот потенцијал во Европа. Според него, ваквиот регулативен пристап е премногу ригиден и ја ограничува технолошката флексибилност што е неопходна во време на транзиција кон одржлив транспорт.

Германската асоцијација на автомобилски производители (VDA), со претседателка Хилдегард Милер, оцени дека идејата за обврска на флоти електрични автомобили од 2030 е практично невозможна. Таа подвлече дека во многу земји ЕУ нема доволно брзи или достапни станици за полнење и дека цената на возилата и нивното оддржување би станала сериозна пречка за компании како Sixt. Од компаниите за изнајмување возила, исто така се слушнаа гласни предупредувања дека туристите ретко вршат избор на електрични автомобили (EV), а поради загуби поврзани со инфраструктурата, автомобилите би биле поскапи, што би довело до намалена побарувачка.

Од политичка страна, пратеникот Маркус Фербер од CSU испрати писмо до претседателката на Комисијата Урсула фон дер Лајен, во кое оцени дека целата иницијатива е практично неодржлива и дека компаниите повеќе ќе купуваат електрични автомобили (EV) само заради исполнување формални квоти, а не поради пазарна или финансиска оправданост. Тој предупреди на реални проблеми со пристап до инфраструктура и економска издржливост на таква регулатива.

Европската комисија, во своето официјално соопштение, не ја потврди информацијата за наводна забрана на возила со внатрешно согорување кај службените и изнајмуваните автомобили од 2030 година. Наместо тоа, беше појаснето дека се работи за предлог кој е сe уште во фаза на разгледување и не е формализиран како конкретна законска иницијатива.

Веќе постои одлука на ниво на ЕУ со која се предвидува забрана за продажба на нови бензински и дизел возила од 2035 година, што значи дека од тој датум натаму сите нови автомобили ќе мора да бидат без емисии на CO₂.Тоа практично значи дека се прекинува продажбата на возила со согорување, освен ако не се појават технологиски алтернативи способни целосно да ги задоволат емисионите стандарди. До тој датум индустријата е под притисок да ги намали емисиите за 55 % до 2030, и за камионски возила да го достигне 90 % намалување до 2040 година. Дел од индустриските групи и некои држави како Германија и Италија, веќе бараат повеќе флексибилност, дозволувајќи користење на CO₂-неутрални горива или хибридни решенија како дел од технолошката неутралност и конкурентност во глобална перспектива.