Еден од најискусните српски репрезентативци, Немања Бјелица, би можел да го пропушти Европското првенство во кошарка кое започнува на 1 септември.

Кошаркарот заработил повреда за време на пријателскиот натпревар против Црна Гора. За тоа колку е сериозна повредата и дали ќе може да настапи на Евробаскетот, ќе биде утврдено со деталните лекарски прегледи што ќе се извршат наредните денови.

Веднаш по натпреварот е направена магнетна резонанца, но поради хематом не може да се види степенот на повредата и нови снимки ќе се направат утре.

Најголемиот успех во репрезентативната кариера Бјелица досега го имаше во 2014 година, кога на Светското првенство во Шпанија го освои сребрениот медал. Поради повреда ги пропушти Олимписките игри во Рио де Жанеиро 2016 година каде Србија исто така беше втора.

Минатата сезона играше во НБА лигата и со Голден Стејт Вориорс ја освои титулата.