Во културно-едукативниот центар „Лабораториум“ на 25 декември, со почеток во 19:30 часот, ќе се одржи промоцијата на новата книга на Ненад Георгиевски со наслов „Ретки птици“. Книгата е збирка интервјуа создадени во период од десет години со најразличен профил луѓе.

Книгата е поделена на два дела: „Мелодии“ и „Зборови, слики и патувања“. Првиот дел содржи интервјуа со познати музички имиња, како Рај Кудер, Збигњев Прајснер, Влатко Стефановски, Стив Ваи, Тереза Салгеиро, Бранко Николов („Фолтин“), Џон Апелгрен и многу други.

Вториот дел, „Зборови, слики и патувања“, опфаќа разговори со уметници и креативци од различни области, вклучувајќи фотографи (Масајоши Сукита и Оливер Белопета), графички дизајнери (Зоран Кардула и Симон Калајџиев), поети (Бранко Николов – Пијан Славеј), сликарот Ване Костуранов, Владимир Мартиновски, режисерот Жарко Иванов, патопиците Урош Крчадинац, публицистите Тони Димков и Александар Трајковски, Дана Сиљан, учител по таи-чи, си-фу, како и менаџери и организатори од институции, како саемот за фотографија „Unseen“ и Музејот на Ван Гог во Амстердам. Посебно место зазема интервјуто со семејството на Жан Мишел Баскијат за изложбата „King Pleasure“, одржана во Њујорк во 2022 година.

„Ретки птици“ е книга што изобилува со длабоки размислувања и гледишта од истакнати уметници и мислители кои ја збогатуваат македонската и светската културна сцена. Преку овие интервјуа, читателите добиваат увид во внатрешните светови, креативните процеси и визиите на авторите, прикажани низ пошироки културни и општествени контексти.

Книгата е објавена во издание на „Полица“, уредник е Милан Дамјаноски, со ликовно-графичко решение на Билјана Билбилоска. Свој настап на настанот ќе има џез-гитаристот и професор Сашо Поповски. Промотори на настанот ќе бидат Александра Јуруковска и Милан Дамјаноски.