Високите температури, но и топлите летни денови по обилните дождови најавува дека зад аголот е уште една сезона на пожари. Но, доколку има пожар во следните два месеци, неизвесна е каква и колкава ќе биде помошта од воздух за пожарникарите, барем кога се во прашање авионите за гаснење на пожари „ер трактор“.

По се изгледа дека Македонија сè уште очекува да ги стави во целост на располагање трите воздухоплови „канадери“ со кои располага, наменети за гаснење на огновите во тешко достапните терени во земјата.

Популарно наречените „ер трактори“ кои беа набавени во 2010 година, неколку години беа приземјени на аеродромските писти и покрај големиот број на пожари кои изминатите години ја зафатија земјава. Причината за тоа беше нивното сервисирање и одржување, кои се исклучително скапи и поради кое и оваа година останува неизвесно летањето на сите три авиони.

Иако „Слободен печат“ се обиде да стапи во контакт со Дирекцијата за заштита и спасување, институција која е надлежна за состојбата на авионите „ер трактор“ и постави прашања со колкави финансии располага ДЗС оваа година за потребите за справување со пожарите, каква е состојбата со екипирањето на персоналот во однос на тоа дали има доволен број на пилоти за управување на леталата и во каква состојба се воздухопловите, сепак не добивме брз одговор на нашите прашања.

Од она што е засега познато е дека во моментов земјава по подолг период конечно има на располагање еден од трите специјални воздухоплови за гасење на пожар „ер трактори“. Тоа уште минатата година пред почетокот на летото го изјави и првиот човек на ДЗС Беким Максути кој истакна дека еден воздухоплов „ер трактор“ бил вратен во земјава од сервис во Шпанија, а за останатите два беше отпочната процедура за нивно испраќање на сервис.

Сепак, на сајтот на ДЗС во секцијата на јавни набавки стои дека во април оваа година институцијата има поништено една постапка за доделување на договор за јавна набавка која се однесува токму на поправка и сервисирање на авионите и обезбедување на резервни делови. Иако специфично не е ништо наведено во објавата на сајтот за кои авиони станува збор и какви резервни делови, упатените коментираат дека тоа е за два „ер трактори“ кои не се во функција сè уште за жал. Во известувањето објавено на веб сајтот на ДЗС стои исто така дека само постапката е прекината а при тоа не се дава образложение зошто.

Од друга страна директорот на Центарот за управување со кризи ЦУК Стојанче Ангелов смирува велејќи дека оваа година сите летала за справување со пожари ќе бидат ставени во функција.

– Информацијата со која јас располагам говори дека оваа сезона на пожари ќе бидат на располагање сите три „ер трактори“ на ДЗС , два хеликоптери на МВР и два на армијата кои се технички опремени за гаснење на пожари. Повторувам покрај подготовката на техничките и човечките ресурси за претстојната сезона на пожари неопходно е и да има подигање на јавната свест кај граѓаните за справувањето со овој проблем. Секако од голем придонес за тоа е и работата на медиумите да известуваат за избегнување на секаков облик на палење на оган на отворено ова лето. Бројот 112 е ставен во функција и тој одлично функционира за координација помеѓу различните институции меѓу кои и противпожарните служби – подвлекува Ангелов.

Од друга страна пак домашните познавачи на состојбите коментираат дека доколку за сервисирање на едно летало се потребни најмалку 45 дена во зависност од степенот на сервисот на „ер трактор“ многу веројатно земјава ова лето ќе има на располагање само еден „канадер“ на располагање за гасење на пожари.

Регионот ги проверува „силите“ за гаснење пожар

Во меѓувреме регионалните медиуми пишуваат дека државите на големо вложуваат во опременување на своите воздухоплови особено оние кои имаат намена за гаснење на пожари. Официјално Сараево минатата година донесе одлука за набавка на авиони и хеликоптери за гаснење на пожар во висина од 15, 3 милиони евра. Според српскиот портал кој се занимава со авијатика „Танго шест“ многу еројатно е дека Сараево ќе набави два „канадери“ и два хеликоптери од типот „Бел“ специјализирани за борба против пожар на недостапни терени.

Слично како и Сараево и официјален Белград неодамна најави купување на нови 30 воздухопловни летала оваа година за потребите на српската армија кои во исто време можат да служат и за противпожарните единици на земјата. Српскиот претседател Александар Вучиќ во тој контекст посочи дека државата за таа намена ќе одвои 145 милиони евра оваа година за набавка на новите летала.

Во исто време хрватските медиуми забележуваат дека Хрватска во период кога температурите растат и некаде веќе се над 30 степени во земјата, властите располагаат само со 4 од 12 авиони за гаснење на пожар.