Една нова студија покажа дека потрошувачката на ултра-обработена храна (UPF) е поврзана со забрзано стареење. Поради оваа причина, треба да ја консумирате што е можно помалку, пишува „Њујорк пост“.

Ултра-обработената храна вклучува грицки, засладени пијалоци, овошен јогурт, житарки, масовно произведен леб, алтернативи од месо итн. Во истражувањето учествувале средовечни и постари Италијанци. Оние кои консумирале повеќе од 14 отсто од дневните калории од ултра-обработена храна биле биолошки постари од нивната вистинска возраст.

Ултра-обработената храна долго време има лоша репутација дека е богата со калории, шеќер, масти и сол. Затоа многу експерти советуваат да се намали нејзината потрошувачка.

„Покрај тоа што е нутритивно неадекватна, богата со шеќери, соли и заситени или транс масти, ултра-обработената храна се подложува на интензивна индустриска обработка што всушност ја менува нејзината матрица, со последователно губење на хранливи материи и влакна“, вели авторот на студијата, Маријалаура Боначо.

Таа додаде дека тоа има многу негативни последици врз метаболизмот и функционалноста на дигестивниот тракт. Имајќи предвид дека ултра-обработената храна често се завиткува во пластична амбалажа, таа на тој начин станува носител на материи токсични за телото.