Херојот на Македонија од Олимписките игри во Токио, Дејан Георгиевски донесе уште еден голем успех за нашата земја.

Нашиот најдобар таеквондист освои бронзен медал на Гран-при турнирот во Саудиска Арабија. Станува збор за турнир на кој учествуваат само најдобрите борци од целиот свет и може да се учествува само со специјална покана од организаторот.

Георгиевски со своите успеси во изминатите години секако дека го заслужи учеството, но не само што учествуваше туку тој се враќа и со бронза со што испиша нова историја за македонскиот спорт.

Во борбата за третото место Георгиевски беше подобар од Смаил Дуисебеј од Казахстан, а во полуфиналето претходно беше поразен од Чејк Салах Сисе од Брегот на Слоновата Коска во категоријата до 80 килограми. Треба да се спомене дека Георгиевски е првиот Македонец кој се враќа со медал од овој голем турнир кој по важноста е веднаш зад Олимписките игри.