Светската метеоролошка организација (СМО) објави дека прогласила нов светски рекорд за најдолг блесок на молња, кој се протегал по должина од 829 километри во Соединетите Американски Држави, од Источен Тексас до Канзас Сити, и се случил во октомври 2017 година, пренесува „Гардијан“.

Комитетот на СМО за временски и климатски екстреми, кој води официјална евиденција за глобалните, хемисферските и регионалните екстреми, го призна новиот рекорд со помош на најновите сателитски технологии, а резултатите беа објавени во Билтенот на Американското метеоролошко друштво.

Овој момент е еден од првите блесоци што се документирани со користење на најновиот модел на орбитален сателит на Националната океанска и атмосферска администрација, познат како геостационарен оперативен еколошки сателит.

Мајкл Џ. Петерсон, водечки автор и член на комисијата за евалуација на Истражувачкиот центар за силни бури при Технолошкиот институт во Џорџија, изјави: „Екстремностите за кои е способна молњата се тешки за проучување бидејќи ги поместуваат границите на она што практично можеме да го набљудуваме. Додавањето континуирани мерења од геостационарната орбита беше голем напредок.“

На автомобил би му биле потребни околу осум до девет часа, а на комерцијален авион најмалку 90 минути, за да го помине растојанието на она што официјално беше најдолгиот блесок на молња во светот.