Во програмата за март на книжарницата и издавачка куќа „Илика“ е објавата на нов роман во едицијата „Современа проза“. Станува збор за романот „Тирза“ од холандскиот писател Арнон Грунберг.

Според „Die Presse“ романот е „вознемирувачко и брилијантно истражување на животот на средната бела класа, зачинето со елементи на семејна драма и трилер.“

Приказната го следи Јерген Хофместер, кој има уредна работа во издавачка куќа, милионска заштеда, мирен семеен живот и го чека денот кога ќе се пензионира. Неговите денови се лежерни и спокојни и тој се гордее со фактот дека спие мирно како бебе – освен понекогаш, кога се прашува дали е, всушност, чудовиште.

Арнон Грунберг е роден во Амстердам во 1971 година. Работи како издавач, новинар и писател, а живее во Њујорк. За својот прв роман „Син понеделник“, издаден во 2000 година, добил награда за најдобра дебитанска книга во Холандија. Оттогаш има напишано и објавено триесетина книги.