Алцхајмеровата болест е најчеста причина за деменција, една од најголемите здравствени закани во светот. Се предвидува дека бројот на луѓе кои живеат со деменција на глобално ниво ќе се зголеми речиси тројно до 153 милиони до 2050 година, а експертите велат дека тоа претставува рапидно растечка закана за идните здравствени и социјални системи на грижа во секоја заедница, земја и континент.

Но, последните истражувања покажуваат дека новиот лек „Донанемаб“ за Алцхајмерова болест, го забавува когнитивниот пад за 35%, зголемувајќи ја можноста за втор ефикасен третман за болеста, пишува „Си-ен-ен“.

„Донанемаб“ ги исполни сите цели на испитувањето и успеа да ја забави прогресијата на состојбата за 35% до 36% во споредба со плацебото кај 1.182 лица со ран стадиум на Алцхајмерова болест, објасни фармацевтската компанија „Ели Лили“. Тоа доаѓа откако резултатите од испитувањата објавени минатата година покажаа дека „Леканемаб“, направен од компанијата „Еисаи и Биоген“, ја намали стапката на когнитивно опаѓање за 27% кај пациенти со рана Алцхајмерова болест.

„Ова може да биде почеток на крајот на Алцхајмеровата болест. По 20 години без нови лекови за Алцхајмерова болест, сега имаме два потенцијални нови лекови за само 12 месеци и за прв пат лековите се чини дека ја забавуваат прогресијата на болеста.“, рече д-р Ричард Оукли, вонреден директор за истражување во Здружението за Алцхајмерова болест во Велика Британија.

Резултатите покажале дека 47% од пациентите кои го примале лекот „Донанемаб“, не покажале знаци дека болеста напредува по една година. Лекот резултираше со 40% помал пад на способноста за извршување на секојдневните активности, велат од фармацевтската компанија „Ели Лили“. Пациентите на „Донанемаб“, исто така, доживеале 39% помал ризик од прогресија во следната фаза на болеста во споредба со оние на плацебо. Сепак, објавени се несаканите ефекти.

При испитувањата се појавил оток на мозокот кај 24% од оние кои го земале лекот, а 6,1% имале други симптоми. Крварење од мозокот се случило кај 31,4% од групата која го земала лекот и 13,6% од групата со плацебо. Стапката на сериозен оток на мозокот во извршената студија за овој лек била 1,6%, вклучувајќи три смртни случаи кои се припишуваат на состојбата на испитаниците.

Истражувачите од фармацевската компанија „Ели Лили“, сметаат дека резултатите се „неверојатно охрабрувачки“ и претставуваат „уште еден многу значаен момент за истражување на деменцијата“. Од таму, планираат да аплицираат за одобрување од „Управата за храна и лекови на САД“ следниот месец, а набргу потоа и со регулаторите во другите земји.

„Овие податоци изгледаат позитивно, но треба да ја видиме целосната база на податоци“, рече д-р Лиз Култхард, вонреден професор по неврологија на деменција на Универзитетот во Бристол.

Се чини дека лекот „Донанемаб“ им помага на луѓето со рана Алцхајмерова болест да ја задржат когнитивната функција подолго и овој ефект изгледа клинички значаен. „Донанемаб“ може да им помогне на луѓето да живеат поквалитетен живот со Алцхајмерова болест подолго време. Доколку се одобри заедно со „Леканемаб“, ова потенцијално носи избор на третмани за пациентите.