Податоците на консултантската куќа „Бостон консалтинг груп“, објавени во новото издание на нејзиниот годишен „Глобален извештај за плаќање“, покажуваат дека во 2023 година, жителите на Германија извршиле во просек по 304 електронски плаќања по жител, објави Политика рс, пренесувајќи го Феникс магазин.

Првото место во електронските трансакции минатата година го зазеде Норвешка со просечни 815 трансакции.

На второ место е Луксембург со 753 вакви плаќања, трета Ирска со 705, а четврта Данска со 675 електронски трансакции. Австријците (300 трансакции), Шпанците (288) и граѓаните на Малта (243), помалку користат трансакции со електронско плаќање отколку Германците.

Италијанците сè уште претпочитаат да плаќаат во готово. Тоа го покажува и податокот дека лани потрошувачите во Италија имале само 194 електронски трансакции.

Финансиските експерти од „Бостон консалтинг груп“, претпоставуваат дека уделот на електронските и дигиталните начини на плаќање ширум светот ќе продолжи да расте во наредните години, но со намалување на профитабилноста на картичките, давателите на платежни услуги, апликациите за плаќање, па дури и банките.