Еден од најпознатите македонски бендови „Нокаут“ вчеравечер во скопскиот локал „Бир гарден“, го промовираа четвртиот албум со наслов „Што бараш ти во моја песна?“.

Сосема очекувано, на настанот се собраа пријателите, соработниците, преставници на медиумите, како и голем број на гости во локалот.

Промоцијата ја отвори музичкиот новинар и водител Антонио Димитриевски кој во неколку реченици на свој уникатен начин ја раскажа приказната за историјата на бендот, проткајувајќи ги насловите од познатите хитови на „Нокаут“.

На промоцијата, која беше од отворен тип, фронтменот на бендот Никола Перевски-Пере, заедно со тимот го претставија најдоброто од својата креативна работа во изминатиов период, во вид на компилација од 14 одбрани песни.

На цедето има 14 песни, дел се нови, дел веќе познати, како „Кога ме сакаш ти“, „Сакам да живеам“, „Шал“, „Позитиво“.  Освен Џамбазов и Перевски, автори на песните во албумот се и Дарко Димитров, Игор Атанасовски-Харе, Огнен Неделковски, Роберт Билбилов, Александар Ристовски-Принц, Филип Неделковски и Венко Серафимов.

Настанот заврши со настап на бендот во живо, со четири одбрани песни од албумот. Меѓу гостите на промоцијата беа музичарот Ристо Вртев од „Архангел“, Александар Ристовски-Принц, Мики Јовановски-Џафер, Огнен Неделковски, младата пејачка Лара и други.