Вицепремиерот и министер за транспорт и врски, Александар Николоски, кој заедно со премиерот Христијан Мицкоски и владина делегација е во посета на Обединетите Арапски Емирати, најави дека се договараат авиолинии кон Македонија со компанијата „Ер Арабија“.

Николоски вели дека туризмот, инфраструктурата и образованието се секторите на соработка на кои се фокусираат на средбите со домаќините.

„Имаме бројни средби, ќе потпишеме неколку договори за економска соработка. Зборуваме и за директно спојување, веќе имаме договор со „Флај Дубаи“ за лет Дубаи – Скопје кој наскоро треба да започне, а зборуваме и со „Ер Арабија“ за отворање на најмалку два лета, од кои еден се надевам дека ќе биде кон охридскиот регион, со што дополнително би се развил туризмот“, вели Николоски.