Повеќето шведски експерти веруваат дека на земјата и претстои катастрофа и „историски масакр“, само што властите тоа не сакаат да го видат.

-Никогаш не сум напишал олку многу посмртници, никогаш не сум работел олку многу часови, вели Иса Јакуб, доктор кој работи во една од најголемите државни болници во Стокхолм.

Тој и неговите колеги не можат да поверуваат колку пациенти со коронавирус пристигнуваат во нивниот објект секојдневно.

– Ајде да го сториме ова заедно, да се молиме заедно за болните … За сите семејства кои не можат да ги видат своите најблиски, за медицинскиот персонал кој се бори во овие тешки времиња – вели д-р Јакуб.

Меѓутоа, кога ќе ја напуштите болницата надвор, владее сосема друга слика. Шведска, за разлика од другите европски земји, не наметна блокада. Во прекрасното пролетно време, луѓето се шетаат како сите да не се борат против опасниот вирус кој однесе животи на скоро 120.000 луѓе.

-Горда сум што мојата земја ми дозволува да се грижам за себе, наместо да ме затвори во домот, вели Тереза ​​Борџлин (35), додека брза да ги посети членовите на своето семејство.

И покрај загриженоста на лекарите и меѓународните експерти, Шведска продолжува да применува „нежен пристап“ кон епидемијата на коронавирусот. Главниот епидемиолог Андерс Тегнел смета дека овој пристап е повеќе одржлив на долг рок.

Училиштата, кафулињата, рестораните, продавниците во Шведска постојано се отворени и луѓето можат да се движат без ограничување. За жал, бројот на пациенти во оваа земја се зголемува. Во земја со околу 10 милиони жители, повеќе од 10,000 луѓе се заболени, а пријавени се скоро 900 смртни случаи. Стапката на смртност во Шведска е повисока отколку во другите скандинавски земји заедно.

Велат дека целта е да се заштитат старите лица, но дали навистина успеваат во тоа

Властите постојано велат дека целта е да се заштитат старите лица. Од избувнувањето на епидемијата, тие ги повикуваат постарите граѓани да останат во своите домови. Сепак, вирусот се „пресели“ во третина од старечките домови во Стокхолм, придонесувајќи за значително зголемување на бројот на жртвите во оваа земја.

Премиерот, Стефан Лофвен неодамна призна дека Шведска не успеала во намерата да ги заштити најранливите и ги предупреди граѓаните да се подготват за сценарио од неколку илјади жртви.

Д-р Карина Кинг, епидемиолог во Каролина, прашува зошто, ако Шведска веќе одбрала ваква стратегија, не гледа како да го спречи бројот на жртвите, туку тоа го смета за нешто неизбежно?

– Повеќето стратегии се засноваат на културни норми, верба дека Швеѓаните ќе ги почитуваат препораките и ќе им веруваат на властите. Стравот ми е дека со толку непознати факти, секоја стратегија која нема за цел да ја минимизира инфекцијата, е проблематична – вели Кинг.

Таа вели дека е тешко да се погледне шведската стратегија од научна гледна точка, бидејќи како што тврди, таа не е транспарентно претставена.

-Постојат очигледни примери каде Шведска не успеа да ги следи препораките на СЗО, тврди Кинг.

На Шведска и се заканува историски масакр

Д-р Холгер Рочен, еден од првите што ги критикуваше владините одлуки и професор по статистика на универзитетот Чалмерс, вели дека Шведска наскоро ќе биде „покорена“ доколку не преземе поостри активности.

Директорот на една болница во Стокхолм неодамна изјави за магазинот „Тајм“ дека епилогот на овој пристап кон пандемијата е „историски масакр“.

Во моментов во болниците во Стокхолм, кој е најтешко погоден од коронавирусот, лекарите мора да изберат кој пациент да го стават на респиратор.

Универзитетската болница Каролинска веќе им наложи на лекарите да не ги примаат пациентите над 80 години на интензивна нега, како и оние на возраст меѓу 60 и 80 години, но кои веќе имаат некои хронични болести.

Премиерот веќе даде предлог да се донесе закон со кој ќе се овозможи брзо затворање на училиштата и јавните површини, како и прекинување на јавниот превоз доколку се влоши ситуацијата.

Епидемиологот Тегнел на прес-конференција рече дека тој е „претпазлив оптимист“ и се надева дека „почетокот на крајот на кризата во Шведска“ веќе е започнат.

Тој посочи дека разговарал со колегите во Велика Британија и дека тие не ги критикувале шведските мерки со оглед дека „постигнале исти резултати“.

– Во многу земји резултатите се постигнати со наметнатите мерки, ние тоа овде го постигнавме со добра волја- рече Тегнел.

Д-р Сесилија Содерберг Науклер, експерт за микробна патогенеза на Институтот Каролинска, смета дека ова верување е неосновано и дека наскоро целата земја ќе ги види последиците.

– Јас сум научник и верувам само во податоците, а податоците говорат дека не чека катастрофа. Ние сме дел од експеримент за кој не сме дале согласност, заклучува Науклер.